وداعاً

حليل
الزول الطاعم
الرجل الكاظم
والسمح صاحب الحس الرائع والاحساس الناعم
فات مثلما اتي
لم يحزن ساعة او تجده ساعة شكي
و بكأنا وبكٌي سماءنا
مويه مطره وقبلي ودهاريب وجعة
وفات بدون رجعة
,,,,,,,,,,,
حليل

خريف الرازة
حليل

الزول الكان
يحتضنك مرة يحتضنك اثنان
وفي التالتة تسيل منو دمعة
ويقولك ما عرفتك
ولما تقول اسمك ويكون عرفك
يقوم لك علي حيلو وينسي كل ألامو وكل ميلو
مات ابوي
يا حليلو يا حليلو
,,,,,,,,,,,,,
فات 
حاج الامين مثلما اتي
بسيطا ,, رقيقا
هاشاً باشاً
لك الرحمة يا صديقي

يا ركوتي كعكعت بللت بها ريقي

يا فرج كربتي وضيقي

لك المغفرة يا يابا

يا حضن كل الغلابة

يا راحة يا واحة للناس التعابه

لك الرحمة والمغفرة

يا
مليان روعة وطيبة وضحكة عجيبة
وبسمة ورسمة ونسمة
تفوح ومطره ترش تملانا بصبيبا
,,,,,,,,,,,,,,,
باي الكلمات ارثيك وباي الدمعات ابكيك

وعلي الله لا نزكيك
فقط نحسبك من الشهداء
وانت تنادي فينا حي عليك يا صلاة
يابا
ايها المسافر في اوكسجين الدم
والساكن في خلايا الروح
لك الرحمة والمغفرة وجنات الخلد
فقط
ستظل فينا باقيا ما بقينا
جميلا وسمحا كالنخيل
لك الرحمة
وطيب الله ثراك 

اقر واعترف

زمان الناس هداوة بال وانت زمانك الترحال
لك التحية كابلي

واياكم اعني يا مغترب
زمانك يا سليل الهم
زمان البؤس والغم

,,,,,,,,,,,,,,,,,,

زمان قالوا عن تاجوج روائع خلدا الدوبيت
زمان لو روميو مات بالحب وقاسم بالعذاب جولييت
زمان لو قيس صبح مجنون وقال في ليلي مليون بيت
وهسي
دق الباب وجانا وجريت لي حفيانا ما قصدت الخيانة
بس دايراهو يقيل معانا
(والجاي احلي)
ويا زمن وقف شوية
وحليلك يا ام كلثوم
وقول للزمان ارجع يا زمان
وهات لي قلب
لا داب ولا حب ولا شاف حرمان

,,,,,,,,,,,,,,,,,,,,

زمان الغناء كان
قسما بمحياك البدر
و يا ناير الوجنات
واضحكي تسحري الكهارب فى الشوارع
وبزيارتك بيتنا نور


وهسي الغناء
وراء وراء وراء
والماعندو وراء يرجع وراء
(بقينا في المؤخرة في كل شيء ياحليلك يا مقدمة ابن خلدون)

,,,,,,,,,,,,,,,,,

جدودنا زمان وصونا على الوطن والتراب الغالي الما لى تمن
وبقينا نفتخر بأننا ضربنا مثلا يحتذي به في تقطيع فستانك يا بلد
تعرت ارجلك حتي بانت فخذيك
خوفي علي عورتك (ابيي) المنطقة الثرة تفصلها خيوط من التعري
و زراعك الايمن حتي ابطك بدأت عليه ملامح العري دارفور اقصدك
و خوفي من زراعك اليسرى تلك الجميلة المكتنزة
يا بورتسودان وشرقنا الحبيب
(شكيناكم علي الاقوي مننا ومنكم يا انقاذ)

,,,,,,,,,,,,,,,,,,,,,,

الفيس بوك , اليوتيوب , الياهو
الماسنجر , النيمبز , التويتر , الاسكايب
العالم اصبح قرية صغيرة
والكذب والخداع اصبح سلع مربحه جدا
وتلقي واحدة خاتا صورة

(بيونسيه)
وتلقي واحد يكتب تحت الصورة
صورتك تجنن ربنا يحفظك
وترد عليهو وتقوليهو ميرسي جدا دا من زوقك
حاجات تخليك تبحث عن عقاب ليمونة
الحاصل شنو يا عالم؟!
بربكم افتوونا

دلالة

جبناها

بالطائرة وبعناها بالخسارة
اسرع

بضاعتنا لن تجد مثلها فى الاسواق
لسنا الوحيدون لكننا الاحزن
خدمة التوصيل لقلبك مجانا ومعها هدية
(حزن تاني)
لا تفكر كثيرا نحن نذهب بعيدا لنأتيك بافضل ما انتجتة ليالي الغربة
واذا خلص القول انا مش مسئؤل

اتفضل نقي واختار واوعدك تحتار

بكاء حامض
قلق مرسوم , خوف محتوم
زهج بايت , قرف طازج , سهر مؤلم , ضحك مصتطنع
فرح منتهي الصلاحية
وحزن بالكوم
(اشتري واحد وسنعطيك ما تبقي هدية)

والمفاجاة الكبري

وصلنا حديثا
ومن اجود ما انتجته
قلوب وكلاوي وام فتفت الغربة
(جوع متبوع , بعطش مربوع , نوم مقطوع , ضحك مخلوع , رضاء مصنوع)
وان لم تجده الاصلي فسيكون بكائك مرجوع

(لا تنسي ايها الباكي وراء السور قريبا فروعنا الحزينة بقربكم وتخفيضات هائلة بمناسبة الافتراق)

مالو لوو

مالو لو
اصبحنا جميلين كما الاطفال نحيا في وئام نعيش في سلام
نكون بالجمال صحوا ونيام
(ولنحب مادمنا نعيش ونعيش مادمنا نحب)
مالو لو
كل زول زرع جميل ولو في غير موضعة ولن ينتظر مقابل
كم سنحصد من جمال وكم سنقتلع من قبح
(فالله جميل يحب الجمال)
مالو لو
كل واحد عاش صداقة جميلة مع كل اهل بيته
كم ستكون الحياة حلوة ويحفها التفاهم والاحترام
(الاسرة السعيدة هي ما يحترم فيها الصغير ويؤقر الكبير ويسودها التفاهم)
مالو لو
بدأنا بتغير انفسنا اولا
ونطلب من الاخرين التغيير كم ستكون تغيراتنا
للأحسن للأجمل للأكمل
يقول غاندي
(كن انت التغير الذي تحب ان تري عليه الاخرين)
مالو لو
عاشت فينا المرؤة والكرامة والنخوة
ومشت بيننا كم ستكون شوارعنا مضاءة ومشعة
بالحب والجمال
(لا خير في قوما ماتت فيهم المرؤة)
مالو لو
غلطت في حقك
تقومني وتنصحني وتدعو الله ان يهديني للصواب
ماذا ستخسر وكم سأربح من نصحك
ويقول مربينا العظيم المصطفي عليه افضل الصلوات واتم التسليم في معني الحديث
(انصر اخاك ظالما او مظلوم ظالما بالنصح والهداية ومظلوم تأخذ حقه من من ظلمه)
مالو لو
تركنا الانانية
وخرجنا بجبهة واحدة متحدة ننقاش مشاكلنا ونعمل علي حلها
بربكم هل سيستعصي علينا حلها
(قوتنا في وحدتنا وضعفنا في تفرقنا)
مالو لو
واصلنا المثابرة والحرص علي ان نصبح اناس صالحين ونترك التخاذل جانبا
(فقطرات الماء المتواصل تثقب الصخر وتفتت كل ما هو قاسي)
مالو لو
يا عزيزي القارئ
صرخت باعلي صوتك وقلت
انا انسان سأعيش انسان واموت انسان
محبا للحب والخير والجمال
(فجمال الروح ينعكس على كل من حولك)

مالو لو
توقفت انا هنا واخبرتكم كم انتم احبة الى قلبي
( ومافي القلب سوي الحب)

سلام مطبوق

من معزة وعزة
من ضُقا معيزاتنا
من جراريب العشم في الليل
من هضليم بلدا سمح بلحيل
جيتكم
بمليون معزة
مليون محبة مليون مخبي
مليون معبي
ذوقا سمح وعديل

,,,,,,,,,,

جيت ليكم
من عرباً بكرموا الضيف
عز الهجير والصيف
من ناس
(انا اخوك إت)
من بلداً تشر حلاوة من ولد يا بت
من فرسان كُماج
سيوف ,,, سيطان عنجه ,,, طبنجة وقد

,,,,,,,,,,,,,,,

دي بداية مطايبا
والتفاصيل قادمات
المقدم الله